ವಿಶ್ವಕಪ್ ಕ್ರಿಕೆಟ್: ಇಂದು ಭಾರತ ಆಸ್ಟ್ರೇಲಿಯಾ ಫೈನಲ್ ಪಂದ್ಯ: ನರೇಂದ್ರ ಮೋದಿ ಸ್ಟೇಡಿಯಂ ಸುತ್ತ ಬಿಗಿ ಭದ್ರತೆ
ಅಹಮದಾಬಾದ್: ಕ್ರಿಕೆಟ್ ವಿಶ್ವಕಪ್ ಕದನಕ್ಕೆ ಕೌಂಟ್ಡೌನ್ ಶುರುವಾಗಿದ್ದು, ಭಾರತ-ಆಸೀಸ್ ಸಮರಕ್ಕೆ ಅಹ್ಮದಾಬಾದ್ ಸಜ್ಜಾಗಿದೆ. ಹೈವೋಲ್ಟೆಂಜ್ ಮ್ಯಾಚ್ಗೆ ಇಡೀ ಜಗತ್ತು ಕಾದು ಕುಳಿತಿದೆ. 20 ವರ್ಷಗಳ ಬಳಿಕ ಭಾರತ-ಆಸೀಸ್ ಸೆಣೆಸಾಟ ನಡೆಯಲಿದೆ.
ಮೂರನೇ ಬಾರಿ ವಿಶ್ವಕಪ್ ಹಿಡಿಯಲು ಟೀಂ ಇಂಡಿಯಾ ಸಜ್ಜಾಗಿದ್ದು, 6ನೇ ಬಾರಿ ಚಾಂಪಿಯನ್ ಆಗಲು ಆಸೀಸ್ ರಣತಂತ್ರ ರೂಪಿಸಲಿದೆ. ಫೈನಲ್ ಕದನದಲ್ಲಿ ಸೆಂಚುರಿ ಭಾರಿಸೋದು ಯಾರು..? ವಿಕೆಟ್ಗಳ ಬೇಟೆ ಆಡೋ ಯಶಸ್ವಿ ಬೌಲರ್ ಯಾರಾಗ್ತಾರೆ..? ಈ ಬಾರಿ ವಿಶ್ವಕಪ್ನಲ್ಲಿ ಭಾರತ ಒಂದೂ ಮ್ಯಾಚ್ ಸೋತಿಲ್ಲ. ಸತತ 11ನೇ ಗೆಲುವು ದಾಖಲಿಸ್ತಾರಾ ಬ್ಲೂ ಬಾಯ್ಸ್..? ಕಾದುನೋಡಬೇಕಿದೆ.
ನರೇಂದ್ರ ಮೋದಿ ಸ್ಟೇಡಿಯಂನಲ್ಲಿ ಹಬ್ಬದ ಸಂಭ್ರಮ ಮನೆಮಾಡಿದ್ದು, ಫೈನಲ್ ಪಂದ್ಯಕ್ಕೂ ಮುನ್ನ ಮನರಂಜನಾ ಕಾರ್ಯಕ್ರಮ ನಡೆಯಲಿದೆ. ವಿಶ್ವದ ನಂಬರ್ ಒನ್ ಸ್ಟೇಡಿಯಂನಲ್ಲಿ ಚಾಂಪಿಯನ್ಗಳ ಕಾದಾಟ ನಡೆಯಲಿದೆ. ಮ್ಯಾಚ್ಗೆ ಘಟಾನುಘಟಿ ಸೆಲಬ್ರೆಟಿಗಳು ಸಾಕ್ಷಿಯಾಗಲಿದ್ದಾರೆ. ಸೂಪರ್ ಸ್ಟಾರ್ಗಳಾದ ಅಮಿತಾಬ್ ಬಚ್ಚನ್, ರಜನಿಕಾಂತ್, ಕ್ರಿಕೆಟ್ ದಿಗ್ಗಜರಾದ ಕಪಿಲ್ ದೇವ್, ಸಚಿನ್, ಗಂಗೂಲಿ, ಧೋನಿ ಸಾಥ್ ನೀಡಲಿದ್ದಾರೆ. ನರೇಂದ್ರ ಮೋದಿ ಸ್ಟೇಡಿಯಂ ಸುತ್ತಮುತ್ತ ಭಾರೀ ಭದ್ರತೆ ಕೈಗೊಳ್ಳಲಾಗಿದೆ. ಗುಜರಾತ್ ಸಿಎಂ ಭೂಪೇಂದ್ರ ಪಟೇಲ್ ಎಲ್ಲಾ ಸಿದ್ಧತೆ ವೀಕ್ಷಿಸಿದ್ದಾರೆ.
ಗೆದ್ದು ಬಾ ಭಾರತ ಎಂದು ಕೋಟಿ-ಕೋಟಿ ಜನರ ಪ್ರಾರ್ಥನೆ ಮಾಡುತ್ತಿದ್ದು, ಆಸ್ಟ್ರೇಲಿಯಾ ವಿರುದ್ಧ ಗೆಲ್ಲುವಂತೆ ವಿಶೇಷ ಪೂಜೆ-ಪುನಸ್ಕಾರ ಮಾಡಲಾಗುತ್ತಿದೆ. ಹೋಮ, ಹವನ, ಪೂಜೆ, ಪ್ರಾರ್ಥನೆ ಮಾಡಿ ಜನರು ಹಾರೈಸಿದ್ದಾರೆ. ಟೀಂ ಇಂಡಿಯಾ ಚಿಯರ್ ಮಾಡಲು ಖುದ್ದು ಪ್ರಧಾನಿ ಹಾಜರ್ ಆಗಲಿದ್ದಾರೆ. ಅಹಮದಾಬಾದ್ ಸ್ಟೇಡಿಯಂಗೆ ಪ್ರಧಾನಿ ನರೇಂದ್ರ ಮೋದಿ ಬರ್ತಾ ಇದ್ದಾರೆ. ಮೋದಿಗೆ ಆಸ್ಟ್ರೇಲಿಯಾ ಉಪ ಪ್ರಧಾನಿ ರಿಚರ್ಡ್ ಮಾರ್ಲ್ಸ್ ಸಾಥ್ ನೀಡಲಿದ್ದು, ಅಹ್ಮದಾಬಾದ್ನ ಸ್ಟೇಡಿಯಂನಲ್ಲಿ ದಿಗ್ಗಜರ ಸಮಾಗಮ ನಡೆಯಲಿದೆ. ರಣರೋಚಕ ಕ್ಷಣಕ್ಕೆ 1.32 ಲಕ್ಷ ಪ್ರೇಕ್ಷಕರು ಸಾಕ್ಷಿಯಾಗಲಿದ್ದಾರೆ. ಇಂದಿನ ಪಂದ್ಯಕ್ಕೆ ಇಡೀ ವಿಶ್ವವೇ ಕಾದು ಕುಳಿತಿದೆ. ಫೈನಲ್ ವಾರ್ ಮಧ್ಯಾಹ್ನ 2 ಗಂಟೆಗೆ ಶುರುವಾಗಲಿದೆ.